Il viadi d'exploraziun da tschintg emnas atras las quatter regiuns linguisticas da la Svizra e la festa fulminanta sin la Plazza federala appartegnan gia al passà e las vaschias vi dals pes èn era gia guaridas. Nus guardain enavos sin in temp excitant cun bleras scuntradas e discussiuns interessantas. Nus vulevan ina giada tractar insaco auter il tema da la quadrilinguitad: a moda giuvna e frestga!
Var 50 persunas da tut las regiuns linguisticas ans han accumpagnà sin noss 750 kilometers atravers la Svizra, passa 500 èn sa fermadas a chaschun da noss dis da project u da nossas acziuns cun fegls sgulants, millis han udì da nossa idea via radio, televisiun u gasettas e 4000 visitadras e visitaders han festegià cun nus la multifariadad da la Svizra sin la Plazza federala. Amicizias e perfin relaziuns èn naschidas sur ils cunfins linguistics or.
Cun luschezza e plaschair pudain nus guardar enavos sin las ultimas emnas. Anc mai ha insatgi mess en pe in project uschè grond e darar avain nus emprendì tant sco durant realisar nossa idea. L'entir success è dentant mo stà pussaivel, perquai che Vus/vus avais cartì vi da nus ed ans avais sustegnì a moda ideala u perfin finanziala.
Per tut quai As/as vulain nus engraziar da tut cor!
Il team da Get-Together
Il project Get-Together vul persequitar il fenomen da la plurilinguitad e promover la chapientscha vicendaivla da las quatter regiuns linguisticas. Get-Together vul unir umans da tut las parts dal pajais ed als animar da s’occupar communablamain cun questa tematica.